A teatri “l’atim fuint” dai zovins

Un test dai prins dal Nûfcent, in esclusive pal Friûl-Vignesie Julie, al rive di vinars ai 11 fint a domenie ai 13 sul palc dal Teatri “Verdi” di Pordenon. “Risveglio di Primavera” (Jevâ di Vierte) di Frank Wedekind, intal adatament e cu la regjie di Marco Bernardi, al è pardabon un simbul de cundizion dai zovins. Un test che al à viodût infinidis edizions e riscrituris, tra chês ancje “L’attimo fuggente” (L’atim fuint), il cine memorabil di Peter Weir cun Robin Williams. Il spetacul al è un viaç penç intal cûr dai zovins e des lôr sperancis, dispès tradidis, in 19 senis curtis dal ritmi di no crodi, cuntune struture simile a chê dal montaç cinematografic. (A.I.) – 10.04.2025