A Ruvigne, doi dîs cu la fieste dal folk

Di cualchi an, al è l’event che al anticipe di un pâr di setemanis (o mancul) il festival “Folkest”, che di cuasi 50 agns al puarte in Friûl la musiche di dut il mont, ma “La fieste de la Sedon” tal cjistiel di Ruvigne e je un event diferent, stant che al centri e je propit la musiche popolâr di chenti. Il riferiment tal non al è ae Sedon Salvadie, nassude tal 1982: la prime formazion a sunâ la musiche tradizionâl, o miôr lis musichis de tradizion furlane, ma cuntun spirt gnûf, daûr di chel “revival dal folk” che al veve cambiât dut ator pe Europe e soredut tes Isulis Britanichis. Andrea Del Favero, che al è stât il fondadôr di un grup cuntune cariere plene di sodisfazions e di colaborazions (Massimo Bubola, The Chieftains, Carlos Núñez, Inti Illimani e Riccardo Tes), al à tirât dentri vie pal timp i nons plui impuartants de sene furlane, di Lino Straulino a Giulio Venier, di Emma Montanari a Marisa Scuntaro, ma al è plui facil nomenâ chei che no àn mai sunât cul grup pitost che il contrari! La fieste che si davuelç tal cjistiel di Ruvigne, sdrumât tal taramot e tornât a fâ sù miôr di prime, une maravee jenfri monts, plane e Tiliment, e dure doi dîs. Sabide ai 6 di Jugn, te Plêf di S. Pieri, al sarà fat un conciert di dôs corâls, Insolitenote di Ruvigne e Villachorus di Vile di Cjargne. Domenie ai 7 il program al tache di buinore cuntune cunvigne ator de musiche furlane dal taramot al dì par cure di Del Favero, Straulino e Dario Marusic, il musicist istrian che al sune di agnorums cu la Sedon. Tal dopomisdì, lis esibizions di almancul trê gjenerazions di sunadôrs furlans: un non di liende, chel dal Trio Pakaj, e altris che a son te storie dal folk revival furlan – i Carantan, Emma Montanari Grop e Marisa Scuntaro. E ancje formazions nassudis tai ultins agns, par esempli Trival e Le Quartette, messedant tradizion e modernitât, pivis e ghitaris eletrichis, armonichis e tambûrs, intun dialic musicâl unic che al lasse vierte la puarte “a ducj chei che a àn voie di fâ une cjantade o une sunade”. (A.I.) – 05.06.2026