A Rivignan, cjançons pal dì dai muarts

Al è nassût un pôc par ridi di un argoment che… nol è nuie di ridi, un pôc par puartâ indevant une antighe tradizion dal Dì dai muarts a Rivignan, il bal su breâr par celebrâ la vite e tal stes timp ricuardâ cui che nol jere plui. Il cjantautôr Rocco Burtone e il comun di Rivignan Teôr, cualchi an indaûr, a àn vût la idee di tirâ fûr chê tradizion dentri de “Fieste dai sants” cul “Festival mondiale della canzone funebre”, la rassegne de cjançon funerarie, che chest an si davuelç sabide ai 2 di Novembar. In gare musiciscj e no dome, stant che il program de serade presentade di Rocco e Tiziana Cosmi al previôt la musiche par armonichis dai AccorDòs, chê jazz swing dai Swing eXcetera, i Tam Tam Tam dal percussionist Stefano Andreutti, il grup dut feminin 4Roses, lis danzadoris dal Viento Flamenco e la Cam Orchestra direte di Gastone Bortoloso, ma ancje la cubie comiche par cine e teatri I Papu. (AI.) – 01.11.2025