A Pordenon al torne il moment dai “curts”

Di miercus ai 23 e fint ai 25 di Lui, te arene UAU! di Pordenon al torne “ FMK – International Short Film Festival”, la storiche rassegne di curtmetraçs inmaneade di Cinemazero, rivade ae vincjesime prime edizion. Si tache simpri aes 9 sot sere cun proiezions a jentrade libare, tal viert, o dentri di Cinemazero se al plûf. Cuindis i ‘curts’ in concors, selezionâts dal “Young Club” di Cinemazero, simpri plui atîf a meti dongje e tirâ su il festival. Si tache cuntune serade dedicate ae animazion, po dopo il cine dal orôr e une serade di miscliç, simpri cui regjiscj presints ae proiezion. Di segnalâ il cine”The Lost White “ di Laura Pizzato, “ Macinazione” di Daniele Ballardin e ”22” di Federico Giovanni Sardi De Letto. (A.I.) – 22.07.2025