A Milan si fevele di Romitelli, a Gurize il conciert

Un spazi di aprofondiment dedicât al grant compositôr Fausto Romitelli (1963-2004), nassût a Gurize e un dai plui visionaris de sô gjenerazion, dongje di jessi un dai autôrs che a àn lassât olmis plui penzis te musiche contemporanie. “La musiche tal avignì di Fausto Romitelli” al è il titul dal incuintri in program martars ai 20, tal dopomisdì, a Milan tal palaç Morando, te suaze dal progjet “Un viaggio da fare”, Un viaç di fa, promovût de Regjon F-Vj pe direzion artistiche di Massimiliano Finazzer Flory. L’event al vûl contâ cualchi moment significatîf de produzion musicâl e de vite di Romitelli, che propit a Milan al veve fat il conservatori e puartât indevant la sô cariere. Cun di plui, sarà fate ancje la promozion uficiâl dal progjet de Regjon: il conciert “The breath of the beast”, in program ai 4 di Lui a Gurize e il dì dopo a Lubiane, simpri te suaze di “GO! 2025”. (A.I.) – 19.05.2025