A Gurize si fevele de inteligjence dai confins

Un scritôr, un regjist, une editore e une critiche: ducj adun tal teatri “Verdi” di Gurize miercus ai 16, te suaze dai events di GO! 2025, par fevelâ di confins cu la marche da “La Milanesiana”. Ven a stâi, la rassegne culturâl ideade e direte a Milan de editore, critiche e regjiste Elisabetta Sgarbi, che l’an passât e à cjapât a Gurize il premi “Amidei” pe culture cinematografiche. “L’intelligenza dei confini”; la inteligjence dai confins, al è il titul di un incuintri che al viodarà ospit il regjist Aleksandr Sokurov, mestri dal cine rus, premiât ae Mostre di Vignesie tal 2011, in dialic cu la critiche cinematografiche Aliona Shumakova, che e à voltât par talian i scrits dal regjist. A vierzi la serade, cuntune emozione e un regâl speciâl al public, il scritôr triestin Claudio Magris – Premi Strega tal 1997, icone de leterature di frontiere – al proponarà un test sul teme de cunvigne mai publicât prime. A sierà la serade. la proiezion di doi cines visionaris di Sokurov in version restaurade. (A.I.) – 15.07.2025