A Gardiscje, Teho Teardo al “sune” la aghe

Intun an che al segne il teritori di confin in graciis de capital europeane de culture, il festival “In\Visible Cities” al torne a Gardiscje daspò di Gurize e Gnove Gurize, cuntun program bon di instreçâ la ricercje artistiche, la partecipazion dal public e une riflession ator dal contemporani. In program passe 60 events, ancje in prime regjonâl e taliane, par un progjet che al à rinfuarçât la identitât an par an. Fint ai 7 di Setembar, i lûcs sielts si mudin intun laboratori di narazion tal viert, là che ogni cjanton al devente teatri, spazi di art o di narazion. La decime prime edizion de rassegne e va ae scuvierte dal teritori cun spetacui fats a pueste pal lûc o in forme ‘itinerante’, tirant simpri dentri il public. Art, memorie e partecipazion si messedin scoltant vôs dal passât e lant a cjatâ lûcs dismenteâts. Il program al fronte i temis de identitât, dai cuarps e dai confins ancje cun nons innomenâts a nivel nazionâl, di Cristina Donà a Marta Cuscunà e al compositôr pordenonês Teho Teardo, che al è un dai protagoniscj de prime zornade, miercus ai 3 te cort dal Cjistiel sot sere cul cine conciert “Aghe, puarte vie dut”. Vie pal dì, ancje la danzadore Marta Bellu cun “Noctiluca scintillans”. (A.I.) – 02.09.2025