A Felet la zornade internazionâl de danze

Dai 1982, ai 29 di Avrîl e je la Zornade internazionâl de danze, volude da Unesco par celebrâ cheste art pal so valôr e tant che element fondamentâl pe cognossince e pe cressite individuâl e in grup. Martars ai 29, tal teatri interatîf “Paolo Maurensig” di Felet, in Comun di Tavagnà,si fasarà une grande fieste cu la compagnie Arearea, nassude tal 1993 a Udin e ricognossude de Regjon tant che teatri di produzion e dal Ministeri de culture za dal 2007, cuant che a àn vierzût il centri di danze contemporanie “Lo Studio”.
Il program che al è stât inmaneât al è plen di events che a tachin di buinore e a van indevant fint ae sere, mudant il teatri intun lûc là che diferentis comunitâts di cuarps in moviment e di gjenerazions tiradis dentri tal progjet “Arearea Dance Library”, sostignût de Regjon F-Vj e di altris ents par riativâ e rigjenerâ lûcs e spazis culturâls sedi publics che privâts.
Daspò dal prin dai trê agns dal progjet, “Arearea Dance Library” e met in struc dutis lis ativitâts fatis fin cumò tal centri di danze de compagnie, Lo Studio, te Galarie “Tina Modotti” e tal “Maurensig”e che a son cressudis dal tresinte par cent (500 par cent pai partecipants e socis parsore dai 50 agns). Ancje i spetacui ufierts tai ultins mês a son cressûts di passe il 200 par cent: une di chês, “Off Label”, fintremai dal 1138%!
A tacâ des 9.30 di buinore, a saran tiradis dentri dutis lis personis che a son jentradis tal progjet, ma ancje lis scuelis di danze dal teritori. Si che duncje si fasaran e si presentaran lezions e laboratoris par zovins, students, fruts e adolessents, ma ancje par personis maladis o assistents di famee, pe cure di cualchi insegnant/coreograf di Arearea. Po dopo a sarà presentât cualchi spetacul e, par sierà, ducj a balâ cu la musiche metude su dal Dj Walter “Watta” Sguazzin, par cure de onlus Progjet Autisim F-Vj. (A.I.) – 28.04.2025