A Feagne la danze e je diferente

Seconde edizion pal “Fagagna Dance Festival”, un event che par cuatri dîs al puarte a Feagne desenis di artiscj di danze contemporanie di dute Italie e dal forest. Di joibe ai 25 e fint a domenie ai 28, cu la colaborazion dal ERT, l’Ent regjonâl teatrâl dal F-Vj, al è pront un program plen di spetacui, laboratoris e incuintris par professioniscj e passionâts. Ideât dal diretôr artistic Pablo Girolami, fondadôr tal 2019 de compagnie Ivona simpri a Feagne, il festival al celebre la bielece de danze in dutis lis formis, ma tirant dentri dute la comunitât paîs. A leâ ducj i apontaments, un scandai de complessitât dal istint uman, il rapuart cul cuarp e cemût che al cambie ancje tai voi des gnovis gjenerazions, la rapresentazion de diversitât e de scuvierte. Ducj i artiscj a àn mancul di 35 agns e tancj di lôr a fasin part de comunitât LGBTQIA+, compagn di chei de Ivona. Cuatri i ‘Ats’ che a saran presentâts, un ogni sere, messedant spetacui di compagniis e danzadôrs diferents, in lûcs sielts par da valôr a dut il teritori (Cjase Cocel, la cjase fuarte La Bruneide, il Cjistiel, Palaç Pico, la oasi des cicognis…) daspò di une esibizion di une scuele di bal dal teritori. (A.I.) – 24.09.2025