A Dartigne il festival di teatri pes gnovis gjenerazions

Daspò dal sucès des primis zornadis cun spetacui e laboratoris, al jentre tal vîf il festival di teatri e culture pes gnovis gjenerazions “Trallallero”, inmaneât dal Teatro al Quadrato – cu la poie de Regjon F-Vj, lis fondazions Friuli e Pietro Pittini, lis comunitâts de mont dal Glemonat, dal Nadison e de Tor. Sui palcs di Tarcint, Dartigne e Glemone a rivi compagniis talianis e internazionâls buinis di dialogâ cui publics di ogni etât e cun esperiencis une vore diferentis, dutis vuidadis dal teme de decime cuinte edizion: “Salvadiis”. Miercus ai 15 a Dartigne, il teatri Lavaroni al darà acet a “Ninabu” de compagnie cravuate Shooma, un spetacul di danze, vôs, cjant e ogjets di rocjâ che al è stât pensat pai frutins dai 3 ai 18 mês. Tal stes dì, te palestre des scuelis aes 7 sot sere, un spetacul pai fruts dai 10 agns cu a compagnie todescje Zinada, “UW – Wind und Wand”, une esperience di danze che e esplore i riviei de adolessence. La rassegne si sierarà domenie ai 19 cun “Play with me” de compagnie udinese di danze contemporanie Arearea, une riflession ator dal zuc reâl e virtuâl. (A.I.) – 14.10.2025