A Cinemazero une pelicule storiche

Martars ai 25, la storie dal cine e torne a Pordenon, li di Cinermazero, cuntune proiezion di “La corazzata Potëmkin”, (La nâf di vuere Potemkin), la opare mestre assolude di Sergei M. Eisenstein, sielte pe serie “Seradis dal cine mut – Cent agns di grandis oparis”. Chest event al è in colaborazion cu lis Zornadis dal Cine Mut e la Cineteche dal Friûl. Il cine, che al conte l’amutinament che si è davuelt pardabon intal Jugn dal 1905 su la nâf dal stes non de Marine Imperiâl russe, al trasforme un episodi storic intune esperience cinematografiche une vore potente, dividude in cinc cjapitui. Un dai moments plui alts dal cine mondiâl, un dai miôr di ducj i timps. (A.I.) – 24.11.2025