A “Carniarmonie” la dediche a Claudia Grimaz

Storiis di e cun feminis a Carniarmonie tai prins dîs di Avost, ven a stâi il moment centrâl de rassegne de mont inmaneade de Fondazion Bon di Culugne pe cure dal diretôr artistic Claudio Mansutti. Daspò de gnove musiche de Austrie – Quintttonic e Wiener Chormädchen – martars ai 5 a For Disot e sarà la cjantautore furlane Nicole Coceancig – premi “Bindi” dal 2024 e premi dal public al festival Suns Europe 2024 – a contâ la storie di une femine che e je il simbul di cetantis altris, “Zohra”, il titul dal so gnûf disc. Miercus ai 6, invezit, tal museu “Gortani” di Tumieç, Carniarmonie e memoree la vôs e la personalitât di Claudia “Caia” Grimaz a cuatri agns de muart rivade masse adore. Un omaç in peraulis e musiche cul so om Trinità Germano, il scritôr Carlo Tolazzi, Nicole Coceancig, Leo Virgili, Giulio Venier, Giuliano Velliscig, Loris Vescovo e altris. Il titul “ Une femine In/cjant” al è compagn di chel progjet che propit Caia e il Vescul e vevin puartât ator, tacant des storiis di feminis contadis di Giorgio Ferigo, messedant vilotis e cjançon popolâr, no dome di chenti. Pe ocasion, e je previodude ancje la presentazion dal libri “Tutto nuovo 5” dedicât a Claudia Grimaz e jessût pe Kappa Vu. (A.I.) – 04.08.2025