Il timp nol scancele, ma al cuvierç e ogni strât che al è taponât sot di chel altri al conte un toc di storie, une civiltât, une culture. La archeologjie e je buine di sgjavâ, lei e interpretâ ducj i nivei che si cjatin, e di li il passât al torne fûr, si lee al presint e al tache un dialic cul dì di vuê. “Strâts” al è propit il titul de decime seste edizion dal festival dal cine di Aquilee, “Aquileia Film Festival”, che dai 29 di Lui e fint ai 5 di Avost al mude place Cjapitul intun grant palc tal viert par proiezions, incuintris e ospits. Il festival di Aquilee al darà acet a cualchi esponent di spic dal mont academic e culturâl: un par sere, jenfri lis dôs proiezions in program, par cure di Piero Pruneti, diretôr de riviste “Archeologia Viva”. Si tache ai 29 cun Francesca Cenerini e tai dîs che a vegnin Luca Peyronel e Jacopo Tabolli, esperts archeolics universitaris. Al prin di Avost un om de television che ducj a cognossin, Corrado Augias, e ai 4 Eros e William Cisilino, president e diretôr de ARLeF, par fevelâ de produzion culturâl dal teritori. A sierâ, il cuasi ‘paron di cjase’ Francesco Tullio Altan, dissegnadôr e mestri de satire taliane, che al è a stâ propit a Aquilee, Ducj i apontaments cui esperts e i cines a son a jentrade libare cence sore nuie, ma cun prenotazion obleade dal puest su eventbrite.it. Ogni sere i cines in concors a saran premiâts dal public e il regjist di chel plui votâts al cjaparà il “Premi Aquilee”: un mosaic fat dai arlêfs de Scuele di Spilimberc. (A.I.) – 28.07.2025
Foto di N. Oleotto
