Un zovin al è stât ferît vuê tor de une e un cuart di dopomisdì a Udin intant che al cirive di difindi une siore e l’om che le compagnave di une agression pussibil, a pocje distance dal puest indulà che al jere stât copât tal 2013 Luca Tisi, om cence cjase scurtissât di Bruno macchi che al è stât condanât al ergastul.
La vitime, un zovin di colôr che al domandave la caritât dongje dal supermarket Despar di viâl Volontari della Libertà, al è intervignût cuant che al à viodût un fantat lâ cuintri de siore cuntun curtissut. L’agressôr al jere il fi de siore che invezit de mari al à dât cuintri al puar zovin che al à cjapât la lame tal flanc, dentri de galarie dal condomini Alpi 1.
Intant che il zovin di colôr, cognossût di ducj par jessi bon, al è stât judât dal personâl de Despar par dopo jessi puartat tal ospedâl, e je rivade la polizie che e à rivât a blocâ daurman l’agressôr. (a.d.g.) – 23.06.2025
