Cuant che a Brugnere la patulie dai carabinîrs è à viodût une machine lâ di ca e di la de strade, e à cirût di fermâle, ma l’om ae vuide invezit al à acelerât a bot e al à cirût di scjampâ.
Pôcs metris dopo però il vuidadôr al à pierdût il control de auto e al è lat cuintri di un porton par blocâsi dentri dal zardin di une cjase. Ae vuide un zovin din 28 agns, restât ferît in maniere grivie dopo che al è stât butât fûr par vie dal incident restant però fracât sot de machine che si jere capotade.
I carabinîrs a àn clamât daurman i socors, rivâts cuntune auto mediche, la ambulance e i Vigjii dal fûc di Pordenon che a a àn lavorât cu lis cisoris eletrichis par liberâ l’om. Il ferît, che al à patît un traume cranic e al basin, al è stât puartât cul elicotar tal ospedâl di Udin. (a.d.g.) – 16.05.2025
