E à non “Une Acuile in Comun” la gnove iniziative promovude de Regjon Autonome Friûl-Vignesie Julie e de ARLeF – Agjenzie regjonâl pe lenghe furlane cul obietîf di valorizâ e promovi la identitât furlane. Un progjet, finanziât de L.R. 07/2024, che in maniere simboliche al scomence cui 3 di Avrîl, date di nassite dal Stât patriarcjâl di Aquilee. A àn aderît adiriture 130 Comuns dal Friûl, fra chescj Gurize, Pordenon e Udin. A ognidun di lôr ur vignarà donade une opare artistiche che, instalade fûr di un edifici rapresentatîf o intun altri lûc di interès storic culturâl, e rapresentarà in mût concret il leam dal popul furlan cu lis sôs lidrîs e cu la sô storie. L’autôr de opare al è il designer Stefano Borella che, par fâle, si è ispirât ae acuile de bandiere dal Friûl, il simbul che plui di ducj al ten adun i furlans. La organizazion e la promozion de iniziative a son puartadis indenant cu la colaborazion di City ADV. Il prin Comun là che si instalarà “Une Acuile in Comun” al sarà Cividât, za capitâl dal Patriarcjât, in Place des Feminis (Piazza P. Diacono). La cerimonie di scree de opare si davuelzarà ai 3 di Avrîl, aes 11 di buinore. (A.I.) – 02.04.2025
67
