Un furgon di forescj cuintri une bariere: ducj ferîts

Incident vie pe gnot tra martars e miercus, tor de une e mieze, dilunc de autostrade A23, tra lis dôs galariis di Perteade, in direzion Tarvis. La Polizie Stradâl di Damâr e je daûr a investigâ, ma al somee che il vuidadôr di un furgon al à pierdût il control, lant a finî cuintri une bariere new jersey. Sul mieç a viazavin vot personis, ducj citadins forescj, che a son restâts ferîts intal colp. La clamade al Nue 112 e je rivade daurman: i infermîrs de sale operative a àn inviât sul puest trê ambulancis e l’elisocors. Une persone e je stade traspuartade in svol al ospedâl Santa Maria della Misericordia di Udin in cundizions seriis. Chei altris siet, cjapant dentri doi fruts, a son stâts traspuartâts al ospedâl di Tumieç, ferîts in maniere no grivie. (A.I.) – 16.11.2022