Siore intosseade dal fum a Tisane

Une femine di 75 agns e je stade ricoverade îr sere a Tisane daspò che e jere restade intosseade dal fum.

L’alarme al è partît tor des 10 e un cuart di sere in vie Florida 27 a Perteade, indulà che une vilute e si è jemplade di fum par vie dal fûc che si jere impiât dentri di une cjamare di liet, indulà che a àn cjapat fûc doi materàs, forsit par cause di un spagnolet impiât. Sul puest a son rivâts daurman i Vigjii dal fûc e i sanitaris che a àn ricoverât la siore tal ospedâl di Tisane.

Un altri intervent dai pompîrs al è stât fat vuê tor misdì a Mortean intun apartament par vie di flamis tacadis suntun sofà, ma la persone resident no à vût problemis e e je jessude fûr di bessole dal imobil. (a.d.g.) – 09.02.2026