Il scuelebus ribaltât daspò dal bot cuntune auto al fat daurman pensâ a un incident di chei tragjics e invezit ducj i fruts e chei che si cjatavin tal mieç a son saltâts fûr di bessôi, ancje se cuatri di lôr a jerin ferîts in maniere no grivie, tant che plui di cualchi gjenitôr al à fevelât di miracul.
Il scuintri vuê di matine tor 8 sul confin tra Trep Grant e Buie, dilunc vie dei Colli inte crosere tra vie Casele e vie Verdi. La coriere che e rivave di Buie, dopo vê puartât i fruts des scuelis mediis, al veve di svoltâ bande Zeanut par puartâ i plui piçui te scuele materne e in chê elementâr cuant che si è dade dentri cuntune auto che e rivave di Trep Grant, cul mieç public che si è ribaltât.
I operadôrs de Sores e àn inviât il plan di emergjence grande cu la pôre che la situazion e fos grivie, tant che sul puest a son rivâts cetancj mieçs di socors tra ambulancis, elicotar, autos medichis e Vigjii dal fûc di Glemone, Udin e S. Denêl.
E invezit, a son restâts ferîts in maniere no grivie dome doi fruts, che un di lôr al veve il braç rot, puartâts tal ospedâl in svol, e doi adults, il vuidadôr de coriere e la assistente che e à judât i fruts a lâ fûr dal mieç ribaltât. (a.d.g.) – 19.09.2025
