Une bande di cuatri albanês, specializade tes robariis intes cjasis di Padue e de sô provincie, a je stade sbaraiade dai agjents de Scuadre mobile de Polizie di Stât de citât venite e di Pordenon daspò un lavôr grant di investigazion.
La cove de bande si cjatave dentri di un imobil di une struture ricetive inte provincie di Pordenon. I agjents a jerin rivâts a cjatâlu daspò un lunc lavôr di investigazion lant daûr di une machine di cilindrade gruesse doprade dai delincuents pai sorelûcs. Intal apartament indulà che i laris a jerin a pene tornâts daspò ve robât in trê cjasis, i agjents a àn cjatât zoiis e bêçs par plui o mancul 200 mil euros, di la dai imprescj doprâts par fiscâ barcons e puartis e radios dopradis par comunicâ dilunc des robariis.
Doi dai cuatri albanês a jerin za cirûts des fuarcis dal ordin. Ducj a son stâts arestâts e puartâts in preson a disposizion de autoritât judiziarie. Lis investigazions a vadin indenant par tornâ a fâ sù dute la ativitât de bande e cjatâ cui che al cjoleve la robe robade. (a.d.g.) – 26.11.2025
