I carabinîrs a àn rivât a scuvierzi e a arestâ la bande di laris serps che e veve robât tra il 2025 e il principi di chest intune vore di cjasis tra Friûl Vignesie Julie e Veni.
I militârs a àn rivât a individuâ la cove de bande, un vecjo cjasâl inte provincie di Ferrara, di indulà che a partivin ae volte dai teritoris sielzûts par robâ.
I militârs dal Nucli operatîf e radiomobile de Compagnie di Tisane, cu la colaborazion dai coleghis di Cento, a àn fate iruzion tal cjasâl blocant daurman cinc citadins serps che a rivavin ducj des provinciis di Napoli e Salerno e che a jerin za cognossûts aes fuarcis dal ordin.
La bande di delincuents e rivave ogni cuindis dîs tal cjasâl metût a disposizion di altris serps par dopo partî ae volte dal Friûl o dal Venit e tornâ daurman indaûr.
In graciis de percuisizion a son stâts cjatâts 5.000 euros in contants, imprescj par scancarâ, trê cubis di targhis clonadis, zoiis e 48 orlois di valôr, che si cîr cumò di capî di indulà che a rivin. Recuperât ancje un Suv cu la targhe todescje che al jere stât robât e cun dentri une sirene, un lampizant blu e une palete stradâl simii a chei doprâts des fuarcis dal ordin, par judâsi tal câs di une fuide. (a.d.g.) -16.07.2026
54
