La Scuadre mobil de Cuesture di Triest e je rivade a sbaraiâ une bande, fate di tredis citadins pakistans, ative in rapiments, estorsions e favoriment de imigrazion clandestine.
La impuartante operazion fate dilunc de Rote balcaniche, in colaborazion cu lis poliziis di Slovenie, Cravuazie e Serbie e je finide îr sere.
Lis investigazions, coordenadis de Direzion distretuâl antimafie di Triest a jerin tacadis dopo dal secuestri di cierts migrants e des denunziis des lôr fameis. La polizie e je rivade a tornâ a fâ su il trafic di puare int che e rivave di Indie, Pakistan, Afghanistan e Nepal e che i delincuents a intercetavin tai cjamps par sfolâts che si cjatin in Serbie. Di chei cjamps, dopo ve paiât tra i 4 e i 6 mil euros, i migrants a vignivin puartats prime in Cravuazie indulà che a jerin tignûts dentri cjasis o albiercs considerâts sigûrs par dopo lâ in Slovenie, indulà che a fasevin a pueste di fâju cjatâ de polizie che jù varès puartats intal centri di acet di Logatec. Dentri chest centri al jere un compliç de bande che al judave i migrants a rivâ in Italie a Triest, doprant trois tal bosc.
In doi câs, cinc citadins Indians a jerin però stâts rapîts e sierâts dentri di doi apartaments a Triest indulà che a vignivin pacats fin cuant che lis fameis no paiavin par ognidun almancul doi mil euros. Doi pakistans a son stâts arestâts propit intant che la polizie taliane e liberave lis vitimis, altris cinc a son stâts blocâts simpri a Triest e un de polizie slovene a Logatec. (a.d.g.) – 15.05.2025
