E je finide sul cricà dal dì la cjace al om tacade îr sot sere, cuant che a Udin e jerin restâts ferîts dai colps di pistole in cuatri di lôr tor des sîs e mieze, denant dal “Cafè Decò”, doi in maniere grivie. Al somee, su la fonde di ce che a àn investigât i agjents de Polizie di Stât, che il scuintri al sedi tacât par cuistions tra dôs fameis: des menacis si è passâts in pôc timp a un curtis pontât tal cuel. Pôc dopo, cuant il grup al è lât plui in là, in vie della Roggia, dongje des palacinis de Ater, un dai oms al à tirat fûr la pistole e al à trat une desene di colps. Tra i ferîts in cundizions plui grivis Kevin Hudorovic, 23 agns, cjapât te panze e intes gjambis e Simone Levacovich di 38 agns, cjapât ancje lui te panze.
Cjapât intune nadie il pari di Kevin, Marshel Hudorovic 50 agns, e Alberto Hudorovic, 28 agns cun feridis lizeris.
Lis ricercjis inviadis de Scuadre Mobile cul jutori de Polizie sientifiche e dai reparts prevenzion dal crimin, a son ladis indenant par dute la gnot fintremai cuant che nol è stât arestât chel che al à doprât la pistole, un om di 40 agns ancje lui di Udin.
Tante pôre tra i residents dal cuartîr che a àn sintût i bots e i berlis che a rivavin dal curtîl di une des palacinis. Sul puest a jerin intervignûts polizie, carabinîrs e i sanitaris dal 118. La Polizie sientifiche e veve cjatât almancul 10 bossui. (a.d.g.) – 12.11.2025
