E je lade a finî ben par un escursionist di Bolzan restat tal viert par trê gnots su la mont Laura a Barcis, daspò jessi rodolât jù par un canalon.
L’alarme pal fat che l’om nol jere tornat indaûr daspò jessi lât vie par une cjaminade ator dal lâc di Barcis sabide ai 10 di Otubar, al è stât pandût vuê a misdì. A salvâlu e je stade no dome la bravetât dai socoridôrs, ma ancje il fat che l’escursionist al veve mandât a cierts amîs sabide di matine une foto fate cul so telefonin che al à judat i esperts a individuâ la aree indulà cirîlu.
Daurman a son stâts clamâts dal Comant di Pordenon dai Vigjii dal fûc i pompîrs di Manià e il nucli cui cjans, clamant in jutori ancje l’elicotar Drago 149 dal Repart di svol Vignesie.
Tor des dôs e mieze dopomisdì dal elicotar al è stât viodût l’om dentri di un canalon che nol rivave plui a saltâ fûr. Par chest i socoridôrs a son lâts ju cu la binte e lu àn puartat dentri dal velivul par dopo puartâlu li dal cjamp di balon di Andreis indulà che lu spietavin i sanitaris. Cun dut des trê gnots passadis tal viert l’om al jere in buinis cundizions di salût. (a.d.g.) – 14.10.2025
