Pordenon e je la Capitâl taliane de Culture 2027. L’anunzi al è stât fat dal Ministri de Culture Alessandro Giuli, dilunc de proclamazion publiche che si è tignude inte Sale Spadolini dal Ministeri de Culture a Rome, in presince dai rapresentants des dîs citâts finalistis. La valutazion des candidaturis e je stade rimetude a une jurie di siet esperts indipendents che, dopo vê fat lis audizions publichis cu lis dîs citâts finalistis, ai 25 e ai 26 di Fevrâr, e à formulât une racomandazion al Ministri de Culture, segnant il Comun plui idoni e motivant la sielte. Cheste la motivazion che e à puartât ae assegnazion dal titul a Pordenon: “Il dossier al propon un model di valorizazion culturâl inovatîf e inclusîf, bon di coniugâ tradizion e contemporaneitât. La impostazion strategjiche e smire a rinfuarçâ la identitât dal teritori traviers progjets che a instrecin patrimoni storic, arts visivis, cine e partecipazion ative de comunitât. Preseade soredut la capacitât di ativâ un procès di coinvolziment difondût che al torne a interpretâ il leam jenfri memorie, teritori e creativitât. Il progjet al vûl fâ la culture un motôr di disvilup sostignibil cuntun program articolât dilunc dut l’an, bon di atrai un public ampli e diversificât”. Il vicesindic rezidôr Alberto Parigi al à comentât daurman: “Cun chest ricognossiment, dute la citât, il so teritori e dut il Nord-Est a concuistin infin un puest inte mape culturâl dal Paîs, cuntune identitât autentiche e ricognossude a plen. Pordenon e je une citât restade dispès ai margjins dal imagjinari coletîf talian, e chest titul nus dâ la oportunitât di ufrî une imagjin complete, di là dai stereotips e lis visions fûr di fûc”. (A.I.) – 12.03.2025
66
