Un om al è restât picjât cul so parecleve tal spic di un arbul tant che a àn scugnût rivâ i Vigjii dal Fûc par tirâlu ju.
Al è sucedût îr tal dopomisdì tor des 5 a Pulfar, indulà che un om al à domandât jutori dopo che al jere restât picjât intun arbul intant che al vignive ju, forsit par cause di un colp di aiar. Une prime scuadre di pompîrs e je rivade sul puest di Cividât che è à controlât lis cundizions dal apassionât.
Dopo a son rivâts cuntun elicotar partît di Vignesie e i tecnics dal Saf (Soccorso speleo alpino fluviale) cjapâts su a Tumieç.
Dut câs nol è stât pussibil recuperâ la persone cu la binte parcè che l’elicotar al faseve masse aiaron che al varès podût fâ svolâ vie la parecleve. Il personâl si è cussì rimpinât sul arbul, leant l’om, che no si jere fat nuie, cu lis cuardis par dopo fâlu lâ jù fintremai sul teren. (a.d.g.) – 24.04.2025
