Aiaron e ploiis fuartis a àn batût tal prin dopomisdì di vuê i Comuns di Purcie, Brugnere, Pordenon e Siest fasint dams e causant discomuts.
Il burlaç al à batût il teritori par plui o mancul 40 minûts, ma tant al è bastât parcè che i Vigjii dal fûc a fossin clamâts plui di 100 voltis par domandis di jutori urgjent, soredut par tirâ vie arbui colâts o malsigûrs su lis stradis e dongje des liniis eletrichis o telefonichis e ancje par arbui lâts a finî fintremai sui cuvierts.
In cualchi câs l’aiaron al à ancje fiscât part dai cuvierts. In jutori dai pompîrs a stan intervignint ancje i volontaris de Protezion civîl regjonâl. Si consee di no clamâ il numar de sale operative dai Vigjii dal fûc parcè che a son ducj impegnâts par frontâ cheste gnove emergjence dal maltimp. (a.d.g.) – 24.07.2025
