Maltimp, passe 150 clamadis ae Sale operative regjonâl

A son stadis passe 150 lis clamadis par domandâ jutori rivadis vie pe gnot ae Sale Operative regjonâl e al Nue 112 tal Friûl Vignesie Julie, par vie dal brut timp che al à batût il teritori.

A son stâts regjistrâts inagaments slargjâts soredut a Pordenon, Lignan, Cormons, intant che te citât sul Nunciel a son stadis segnaladis colade di ramaçs, come che al è stât segnalât de Protezion civîl dilunc dal inzornament di vuê di matine.

Su dute la regjon, tacant de sere di îr, a son rivâts une schirie di temporâi cun ploiis abondantis tra i 40 e i 80 milimetris. A son stadis regjistradis ancje bugadis di aiaron che su la cueste a son rivadis a 60 chilometris oraris. (a.d.g.) – 03.06.26