Su Lignan e je vignude jù aghe a seglots tant che ae une di dopomisdì a jerin za colâts 211 milimetris, tant che a àn scugnût evacuâ i ospits dal Camping Village Pino Mare, plui o mancul vincj che a son stâts trasferîts dentri de sale riunion dal magazen comunâl, za preparade ancje cul jutori de Protezion civîl locâl, che dentri a àn ancje puartât di bevi e di mangjâ.
“La tante ploie colade e à mandât in crisi il sisteme di smaltiment – al à spleât Marco Donà l’assessôr ai Lavôrs publics e ae protezion civîl di Lignan – e di consecuence a son lats sot aghe stradis, garage e cantinis indulà che il nivel al è rivât a cualchi metri. La zone plui batude e je chê di Riviere, soredut vie Casablanca”.
Tal ultin rapuart de sale operative de Protezion civîl regjonâl di Palme si fevele di une vore di situazion critichis ancje a Tisane, S. Zorç di Noiâr, Flumisel Vile Visentine, Rocjis di Monfalcon, Foian Redipulie e Gonârs indulà che a son stâts inagaments intes abitazions e dai sotpàs.
Plui di 40 i volontaris des scuadris di Protezion civîl in vore in chestis oris. (a.d.g.) – 10.09.2025
