Lis previsions dal timp, magari cussì no, a àn induvinât ancje cheste volte e sul Friûl-Vignesie Julie, soredut in chel Ocidentâl, si è scjadenade une tampieste fuarte che e à fat dams.
Mancul di chel che si veve pôre, tant plui che la Protezion civîl e veve pandût la alerte zale, ma dut câs îr di sere di Sacîl e fintremai a Çopule, passant par Cjanive, Brugnere, Fontanefrede e Pordenon, a àn tacat a vignî jù grignei di tampieste bogns di fa dams, tant che in cierts câs si fevele di “claps” plui grancj di 10 centimetris di diametri.
Par fortune la tampieste e à batût e fat dams soredut tai cjamps, ma al tocje meti in cont ancje i miârs di saetis che a son vignudis jù che di cualchi bande a son stadis buinis di impiâ fûcs, come a Resie intun bosc, a Vildivar indulà che al à cjapât fûc un cuviert di len intune palacine e a Vilès intun capanon..
Temporâi fuarts un pôc par dut che a àn batût soredut il Friûl di mieç, ma ancje la cueste e il teritori di Gurize e Monfalcon cun dams causâts soredut dal aiaron che al à sdrumât arbui e lampions e dai inagaments, che lis segnalazions ae sale operative de Protezion civîl a son rivadis par dute la gnot. Tant lavôr pai Vigjii dal fûc di mieze regjon che a àn fat almancul 70 intervents des vot di sere di îr aes vot di matine di vuê. (a.d.g.) – 27.06.2025
