Cuasi tal ultin, tant che inte salvece storiche dal 1981, l’Udin al è rivât a fâ il miracul, in trasfierte a Frosinone, vincint la partide che e significhe podê zuiâ pe trentesime volte une daûr di chê altre ancjemò intal campionât di serie A. Il 0-1 finâl, rivât a mancul di un cuart di ore de fin, cuant che i blancs e neris a jerin in maniere “virtuâl” in B, al è stât merit dal gol di Keinan Davis, viodût masse pôc in dut il campionât, ma ancje des paradis di Okoye. Grant merit ancje al alenadôr Cannavaro, clamât par cirî di fâ il miracul pôc plui di un mês indaûr: l’ex campion dal mont e Balon di aur al à fat dôs vitoriis e dôs patis in 5 partidis (contant ancje i fruçons dal recupar cu la Rome, uniche partide pierdude). Cuntun miâr di furlans in trasfierte, i tifôs a miezegnot a son lâts jù intes stradis di Udin a celebrâ: no si viodeve une ‘fieste’ cussì dai timps des cualificazions in Europe. (A.I.) – 27.05.2024
86
