Une lare che intai dîs passâts e veve robât il tacuin ae titulâr di un bar tal centri di Udin e je stade cjatade in graciis des telecjamaris di control dentri di une coriere.
Il tacuin de siore di 74 agns al jere inte borse dentri di un armâr e al veve dentri 100 euros, documents e ogjets personâi.
La lare e veve rivât a puartâlu vie tignint platade la muse cuntune mascarute e la cape. Cundut di chest, la polizie locâl e à ricognossût la femine intes imagjinis di control di une coriere e e je rivade a scuvierzi di ce bande che e jere lade e a viodi in muse la lare – che e veve za robât altris voltis – une volte che e jere smontade jù dal mieç di traspuart urban. Ae fin des investigazions, il Nucli di Polizie judiziarie e à denunziât ae Autoritât judiziarie une citadine taliane di 47 agns che e je a stâ a Cjampfuarmit par robarie ingriviade. (a.d.g.) – 15.12.2025
