“La industrie furlane e continue a mostrâ capacitât di adatament e resilience, ma e reste esponude in maniere fuart ae evoluzion dal senari internazionâl, ai coscj de energjie e aes cundizions de domande europeane”. E je tacade di chi la analisi fate dal president di Confindustria Udine, Luigino Pozzo, su la fonde dai dâts de indagjin coniunturâl elaborade dal Ufici Studis sul andament de industrie in provincie di Udin tal prin trimestri dal 2026
Il cuadri che al salte fûr al è chel di une manifature che e torne a dâ cualchi segnâl di vitalitât a pet de fin dal 2025, ancje se e reste ancjemò fragjil a pet dai nivei dal an passât. La produzion industriâl e regjistre cun di fat une variazion positive dal plui 0,6% a pet dal cuart trimestri dal 2025, intant che e reste di pôc negative la dinamiche tendenziâl (mancul 0,2% a pet dal stes periodi dal 2025), daspò dal provisori rinfuarciment regjistrât te ultime part dal an passât (plui 1,5% sedi sul plan coniunturâl, sedi su chel tendenziâl). (a.d.g.) – 25.05.2026
