Il Grup Nord Est Multimedia (Nem) al à comunicât di vê firmât cu la societât Finanziaria Danieli (Findan) il contrat pe cession dal 95% dal Grup Telefriuli. Il 5% che al avanze al reste tes mans di Confindustria Udine. “O vin fat un impuartant pas inte costruzion di un pôl multimediâl, leader tal Nord Est, bon di dâ une vôs autorevul a cheste aree dal Paîs – al à dit Enrico Marchi, president dal Grup Nem -. O sin convints che di cheste acuisizion a rivaran sinergjiis operativis une vore impuartants e buinis di rinfuarcî sedi lis testadis di Nem, che e deventarà simpri plui protagoniste in Friûl”.
La aventure di Nem e je tacade te Sierade dal 2023, cuant che a son stadis compradis dal Grup Gedi lis dôs testadis plui impuartants dal Friûl Vignesie Julie, ven a stai Il Piccolo e il Messaggero Veneto, adun cun cuatri cuotidians venits: Il Mattino di Padova, La Tribuna di Treviso, La Nuova Venezia e Il Corriere delle Alpi di Belluno.
Cu la acuisizion dal Grup Telefriuli de bande dal Grup Nem, e je stade ancje rinovade la governance: Telefriuli e sarà vuidade di Luciano Colombini; tal Consei di aministrazion a son Alfonso Di Leva (confermât tant che aministradôr delegât e za diretôr editoriâl), Giuseppe Cerbone, Paolo Possamai e Daniele Stolfo.
“Cu la vendite di Telefriuli – al à displeât Alessandro Brussi, president dal Grup Danieli – si siere il percors tacât dal inzegnîr Gianpietro Benedetti aromai vot agns indaûr adun cun altris imprenditôrs locâi par meti a disposizion de comunitât furlane une emitent televisive inovative e eficient. Cumò al tache un gnûf cjamin cun Nem par creâ une plateforme di informazion moderne e integrade par rispuindi miôr aes esigjencis de comunitât”
Il network MediaFriuli al cjape dentri di la di Telefriuli, ancje La Vôs dai Furlans, unic setemanâl di cjarte par lenghe furlane plui, zontâts a rotazion, i mensîi Il Friuli e Business e i l trimestrâl Green; a son cjapâts dentri ancje i sîts web lavosdaifurlans.com (par furlan), telefriuli.it, ilfriuli.it, udineseblog.it e la societât Euronews Srl (concessionarie publicitarie dal grup). Il Grup Telefriuli al dâ lavôr in dut a 30 dipendents, cuasi ducj operatîfs inte gnove sede di Felet (aes puartis di Udin), cun regjis e studis televisîfs di ultime gjenerazion sul plan des tecnologjiis metudis in vore. Tecnologjie e spazis funzionâi gnûfs ae realizazion di format bogns par insiorâ il palinsest de ufierte informative de Rêt.
La integrazion di Telefriuli e ponte a rinfuarcî la presince dal Grup Nem in Friûl, soredut par mieç de cressite dai events cu la sô marche. Il cûr dal progjet, dut câs, al rive de mission editoriâl di Nem, indulà che lis redazions gjornalistichis – soredut di Telefriuli e il Messaggero Veneto – a varan cjamp slargjât par afermâ il rôl primari di sogjet informatîf regjonâl.
La operazion Telefriuli e ven fate dentri di un pan industriâl plen di ativitâts di ricostruzion dal grup (al baste fevelâ il riimplant tecnologjic dai siet sîts Nem, di la dal dissen tornât a fâ de grafiche dai gjornâi). Al è di segnalâ ancje la resint acuisizion de societât Post Eventi (tornade a nomenâ Eventi Nem) finalizade par pensâ e meti sù un cartelon di events che, tal 2025, al à jemplât 100 zornadis, dentri di un hub multi informatîf integrât che si declare midiant di cjarte stampade, Tv e events di aprofondiment cun tant public. (a.d.g.) – 30.06.2026
