Al passarà ancjemò une volte pal Friûl, daûr des promessis di cualchi mês indaûr. E lu fasarà tacant di Glemone, la “capitâl” di une grande tragjedie, par memoreâ lis vitimis dal taramot dal 1976, ma ancje e soredut chei che a àn fat deventâ pussibile la rinassite e il model di Friûl. La gare di ciclisim dal “Giro d’Italia”, presentade a Rome, e previôt propit la penultime tape de gare in Friûl: chê che e podarès decidi il vincidôr, ai 30 di Mai tal 2026, la dì prime de “parade” te capitâl. La tape di 200 chilometris e sarà forsit decisive, par sigûr e je iconiche e ancje dificile. La strade, che e tache de Caserme “Goi Pantanali”, là che a son muarts 29 soldâts alpins e là che e je stade fondade la protezion civîl, e passarà pai comuns sdrumâts dal taramot dilunc des dôs provinciis di Udin e di Pordenon. La linie de rivade e sarà a Plancjaval, là che a laran sù dôs voltis e po dopo a tonaran jù fint al lât di Barcis. Il “Giro-E” al tache invezit di S. Denêl e si incrosarà cul percors de vere tape a Travês. E domenie ai 31, la seconde fase dal “Giro Woman” pes feminis, dut in Venit, che al passarà par Brugnere, Pasian e Prate e e po dopo al rivarà a Buie al prin di Jugn. (A.I.) – 02.12.2025
42
