Une gnot di pôre par vie dal brut timp in Friûl, che in cualchi lûc al à puartât passe 120 mm di ploie intun pâr di oris. La situazion plui grivie a Breçan di Cormons, dulà che une sdrumade di pantan e à tirât jù trê cjasis aes cinc di buinore. Une persone e je stade tirade fûr vive dai rudinaçs e puartade tal ospedâl di Udin cuntune gjambe rote. I pompîrs a son supuartâts dai volontaris de Protezion Civîl che a stan cirint dôs personis disparidis. La ondade di brut timp che e jere stade previodude e che e à sdrumade la nestre regjon a tacâ di domenie di sere e à causât diviersis emergjencis in dute la regjon, in particolâr inte zone jenfri Palme e Trivignan. Dozenis di Vigjii dal fûc e di personâl de Protezion Civîl a son daûr a lavorâ za de gnot passade par frontâ la situazion, cuntun supuart domandât ancje dai coleghis de regjon dal Venit. Daspò che e je scomençade la alerte, la Sale di Operazions Regjonâl e à ricevût segnâi di inondazions tai comuns di Cuar, Bagnarie, Gonârs, Trivignan, Dolegne, Palme, Tor di Zuin, Cormons, S. Vît de Tor, Jalmic, Prepot, Çarvignan, S. Zorç, Visc, Dael. Un om anzian blocât intune machine che e jere lade intun fossâl tal comun di S. Zuan dal Nadison al è stât salvât a pêl dai pompîrs. Di Sotselve a Vierse, fint a Trivignan, no si passe in machine su lis stradis, ma il stes al sucêt in cuasi dute la zone colpide. L’ospedâl di Palme al à sot de aghe. A Dolegne, ancje il ristorant “All’argine” di Antonia Klugmann al è stât inagât. La ploie e varès di lâ indevant fint a lunis di sere, cuant che al rivarà un front frêt de Austrie, puartant aiar e nêf su lis monts. (A.I.) – 17.11.2025
85
