Un muart e un ferît une vore grivi par cause dal fûc che al à cjapade une barcje che si cjatave peade intune marine a Palaçûl cun dentri une cubie di turiscj todescs.
L’alarme al è partît in plene gnot. Tor une di vuê i Vigjii dal fûc a son rivâts sul puest cu lis scuadris dai distacaments di Lignan e Tisane judadis di un funzionari rivât di Udin. Lis flamis a stavin fiscant une barcje di 12 metris. Un om che al jere dentri al à rivât a butâsi in aghe e al è stât socorût dal personâl sanitari e puartât daurman cul elicotar tal ospedâl. Magari cussì no la sô femine e je restade blocade dentri e e je muarte. I pompîrs a àn doprât ancje un licuit a pueste rivant a blocâ il fûc prime che al cjapàs altris barcjis.
La barcje che e jere fate di vitroresine e je stade sdrumade dal dut e e je lade sot e par chest a son stâts clamâts ancje i tecnics dal socors subacui dai vigjii dal fûc di Triest che a àn rivât a puartâ fûr il cuarp de puare femine. Lis causis dal fûc a son sot investigazion. (a.d.g.) – 23.04.2025
