Une femine e un cjan a son stâts cjatâts muarts vuê di matine inte frazion di Pieretaiade tal teritori di Pontêbe. A dâ l’alarme la int dal puest che tor des 11 di matine di vuê a àn viodût un piçul furgon cun targhe austriache parcât in bande ae strade pôc lontan dal puint che al puarte bande de strade Pontebane, cun dentri la femine cence vite.
Sul puest a son rivâts i sanitaris mandâts de Sores ma no àn podût fâ altri che declarâ la muart de femine. Daspò dentri dal mieç al è stât cjatât ancje il cjan muart. Sul puest i carabinîrs de Compagnie di Tarvis che a stan fasint lis investigazions e i Vigjii dal fûc che a àn metût in sigurece la aree ator dal mieç par permeti ai investigadôrs di fâ i rilêfs.
Dute la zone e je stade delimitade par conservâ ducj i elements utii a capî ce che al sedi sucedût. Par chest a Pieretaiade a son rivâts ancje il miedi legâl, il public ministeri di turni de Procure di Udin ei tecnics dai reparts investigatîfs sientifics dai carabinîrs. (a.d.g.) – 28.08.2026
