E sarà fate doman di matine, intal ospedâl di Tumieç, la autopsie dal cuarp di Paolo Straulino, l’operari di Sudri muart par cause di un altri incident sul lavôr vie pe sere di sabide ai 3 di Mai intal stabiliment de cjartere di Davâr. L’incaric al sarà dât intai uficis de Procure de Republiche di Udin dal Public ministeri Claudia Danelon al miedi legâl Carlo Moreschi e al tossicolic Riccardo Addobbati.
I doi consulents tecnics e podaran cussì fâ l’esam che al ocorarà par sclarî lis causis de muart, ma si intint ancje tirâ fûr altris elements che a sedin utii par ricostruî la dinamiche dal incident, par chel a son stâts iscrits intal regjistri dai indagâts cuatri dipendents de aziende Reno De Medici, ancje chê sot investigazion. (a.d.g.) – 08.05.2025
