Un câs di virus Dengue al è stât segnalât de Aziende sanitarie dal Friûl centrâl a Udin, indulà che il sindic Alberto Felice De Toni al à firmât vuê di matin une ordenance urgjent a tutele de salût publiche. Il virus al à cjapât une persone te zone di Planis ator di vie Monte San Marco.
Par vie de presince di sîts sensibii, al è stât ordenât un intervent straordenari di disinfezion tal zîr di 400 metris de abitazion de persone malade. La operazion e tacarà aes 2 di gnot dai 30 di Lui e e sarà fate cun trataments bogns di copâ i moscjins che a puartin la malatie e lis larvis.
Je invezit di cheste sere la gnove che al è stât cjatât il prin câs di persone tacade dal virus West Nile tal Friûl Ocidentâl. Si trat di un om di 70 agns che al vîf a Cjons, indulà che a tacaran daurman, su la fonde di ce che al previôt il protocol talian, lis operazions di disinfezion. (a.d.g.) – 29.07.2026
