Une femine di 52 agns e je lade fûr strade vuê di matine, tor 11, a Mezamont di Polcenic. La siore, che e je a stâ inte zone, e stave passant dilunc une strade no asfaltade cuant che e à pierdût il control de machine lant jù par plui di 15 metris intun sdrup fintremai cuant che un arbul al à blocât la corse.
Par fortune la femine no si è fate nuie ancje se e jere plene di pôre cuant che a son rivâts sul puest i Vigjii dal Fûc che a àn peât il veicul cun cuardis di açâl par metilu in sigurece prime che al les jù ancjemò tal straplomp.
Daspò i tecnics dal Socors alpin a son lâts jù cu lis cuardis par recuperâ la siore. In dut a son coventadis dôs oris. Sul puest ancje il personâl dal elisocors che al à visitât la femine prime che e fos puartade vie de ambulance bande dal ospedâl di Pordenon par altris aciertaments. Sul puest ancje i carabinîrs. (a.d.g.) – 16.06.2025
