No le à fate Simone De Cillia, il zovin di 33 agns di Tarvis che îr tor des cuatri e mieze dal dopomisdì al è stât cjapât in plen di une lavine intant che al passave cul so snowboard suntun toc tra la Mont Sante dal Lussari e la Mont Prasnig.
Tal dopomisdì De Cillia al veve decidût, in compagnie di doi amîs, di fâ snowboard fûr piste a une cuote di 1.600 metris intune zone che al cognosseve ben, ma magari cussì no la lavine vignude jù lu à strissinât fin dentri di un canalon, intune zone une vore dificil di rivâ ancje pai socoridôrs che a son partîts a pene vê cjapât l’alarme, che par rivâ in cuote a àn podût doprâ i implants, ancje parcè che il mal timp al blocave l’elicotar.
Une volte cjatât il zovin i socoridôrs a àn cirût di stabilizâlu e rianimâlu, ma cuant che al è rivât cu la ambulance tal ospedâl di Udin, lis sôs cundizion a jerin disperadis par vie dai tancj traumis e il so cûr si è fermât, lassant dute la comunitât di Tarvis in corot. (a.d.g.) – 05.02.2026
