Si jere slontanade intant che il so om si jere indurmidît te auto a Bosc Romagn, ma daspò che al jere stât pandût l’alarme tor des vot sore sere, tant che si jerin alçâts in svol ancje i elicotars, la siore di 88 agns e je stade cjatade a cjase sô sul cricâ dal di di vuê.
L’om al veve clamât il 112 disint che si jere indurmidît inte sô auto parcade tai boscs tra Cividât e Cuar di Rosacis, daspò ve fate une cjaminade cu la femine, ma cuant che si jere sveât no le veve plui cjatade dongje.
Al veve provât a cirîle e a clamâle e alore al veve decidût di domandâ jutori.
A jerin cussì intervignûts desenis di operadôrs tra Vigjii dal fûc, Protezion civîl e Socors alpin e si jerin alçâts su ancje doi elicotars, chel de Sores e chel dai Vigjii dal fûc prime che al rivàs il scûr, ma lis ricercjis no vevin dât risultât.
Tor des cinc di vuê di buinore, la siore e je stade cjatade dentri cjase, indulà che e jere tornade di bessole. Sul fat che al è di sclarî e sta investigant la Polizie. (a.d.g.) – 01.09.2025
