Cjatade muarte vuê di matine, dentri dal so apartament in Vie Grazzano a Udin, une femine di plui o mancul 60 agns, di origjin russe, cognossude in citât tant che une interprete rispietade.
L’alarme al è stât dât aes 8 e 50 di matine cuant che la sale operative dai pompîrs di Udin e je stade clamade parcè che lis scjalis di un condomini, al numar 27, a jerin plenis di fum. Sul puest a son rivadis daurman une scuadre, la autoscjale e une autobote cun ancje il funzionari che al jere di vuardie.
A pene jentrâts i vigjii dal fûc a àn identificât l’apartament di dulà che al rivave il fum. Cuant che a son jentrâts tal imobil plen di fum, i salvadôrs a àn cjatât la puare femine distirade incussient par tiere tal salot, indulà che al jere scomençât il fûc.
Intant che une part de scuadre e studave lis flamis, altris pompîrs a àn socorût la femine puartantle fûr dal l’edifici, indulà che i sanitaris no àn podût fa altri che declarâle muarte. (a.d.g.) – 23.12.2025
