La Cjartere di Davâr vuê e reste sierade e, tal dopomisdì, al è stât fat aes trê di dopomisdì un minût di cidin in ducj i stabiliments dal Grup Rino De Medici, dopo dal infortuni che al à copât Paolo Straulino, 50 agns di Sudri, restât fracât sot di un imbalaç di cjarte strace pesant 12 cuintâi.
L’incident al è sucedût inte serade tarde di sabide. La dinamiche e je sot investigazion, ma al somee che Straulino al fos a pene smontât dal mulet cuant che al è stât cjapat dal caric di cjarte strace colat de pale mecaniche vuidade di un coleghe.
Al è stât dât daurman l’alarme, ma pal puar operari nol jere plui nuie ce fâ. Il Grup Rdm, che îr di sere al veve esprimût vicinance ae famee di Straulino, al à ancje confermât che vuê il stabiliment di Davâr al sarès restât fer. (a.d.g.) – 05.05.2025
