Al à ametût di jessi stât lui a copâ Franco Bernardo Bergamin, pôc dopo di jessi stât arestât a Monfalcon.
Si trate di Alessio Battaglia, 41 agns, triestin, cjapât dai carabinîrs di Padue vie pe gnot passade dentri de cjase de morose, dopo ricercjis ladis indenant par almancul doi dîs tra Venit, Trentin e Friûl-Vignesie Julie.
L’om nol à fat resistence e al à contât ai agjents di vê copât il pensionât di 80 agns. Il cuarp de vitime al jere stât cjatât sierât dentri di doi sacs platâts intun armâr doi dîs indaûr, dentri de sô abitazion a Limena in provincie di Padue. Su la fonde di ce che al à contât, dut al è tacât cuntune barufe tra i doi oms, che a jerin a stâ te stesse abitazion.
I aciertaments fats dal miedi legâl e fevelavin dal fat che il sassin al veve agjît cun ferocitât spacant il cuel de vitime. (a.d.g.) – 07.03.2025
