I fûcs che a stan batint la regjon, de mont parsore Pordenon e fintremai dal Cjars a àn sburtât la Regjon a declarâ il stât di pericolositât massime pai fûcs tal bosc su dut il teritori.
A pesin une vore lis temperaduris une vore altis, l’aiar e il sec che a àn judat lis flamis che tal fin de setemane a àn fiscat cetancj terens, tant che i 20 etars brusâts a Monrupin e i 45 lâts in fum a Claut, cence dismenteâsi dai fûcs ancjemò impiâts a Andreis, Dimpeç e Tramonç Disore, di spes impiâts des saetis dongje te part alte de mont.
Il proviodiment al restarà valit a timp indeterminât. Al è improibît impiâ fûcs, brusâ robe e fa sclopâ bots. Improibît ancje il doprâ imprescj a flame libare o che a podin produsi faliscjis fûr des areis furnidis a pueste e cussì ancje butâ spagnolets o fulminants impiâts. Par cui che nol ves di rispietâ la improibizion lis sanzions a saran dopleadis e a laran di 200 a 2 mil euros. Lis stazions dal Cuarp forestâl regjonâl a àn za tacat a fa plui controi e a vigjilâ su dut il teritori.
Intant a vadin indenant lis operazions di distudament a tiere e cui elicotars par cirî di morestâ i dams pal ambient e ridusi lis emissions di anidride carboniche. (a.d.g.) – 13.07.2026
