I agjents de Scuadre mobile de Polizie di Stât di Udin a àn arestât, ai 28 di Zenâr, trê oms cu la acuse di fraude ingriviade.
Cheste volte si tratave di delincuents che a vevin clamade la vitime, une siore di 84 agns di Buie disint di jessi avocats che a judavin so fie, che e veve cjapât sot une piçule e si cjatave in fer di polizie. Par tirâle fûr des rognis e paiâ lis spesis medichis a vevin daurman bisugne di une vore di bêçs. Cussì la vitime plene di pôre e veve spesseât a tirâ dongje dutis lis zoiis che e veve par consegnâlis a un om che si jere presentât tant che colaboradôr dai avocats.
Ce che i trê delincuents no savevin al jere che la polizie e stave lôr daûr daspò ve vût suspiet tal viodi la lôr machine a Udin, tant che a àn tacât a controlâ i lôr moviments fintremai a Buie.
I agjents a àn spietât che i fraudadôrs (il vuidadôr e il so compliç) a puartassin vie l’aur ae vitime e che a tornassin intun hotel di Udin indulà che a spietâju al jere il tierç component de bande, par dopo arestâju.
La percuisizion fate intes cjamaris dai trê, che a rivavin di fûr de regjon, e à permetût di cjatâ dut l’aur che al è za stât tornât ae siore di Buie. I trê delincuents invezit a son stâts puartats intun lamp inte preson di Udin indulà che si cjatin daspò che il judiç pes indagjins preliminârs al à convalidât l’arest.
Si torne a ripeti che nissune fuarce dal ordin e tant mancul avocats o altris professioniscj a clamin par domandâ bêçs o robe di valôr e che al è simpri ben clamâ daurman il 112 , un parint o un vicin di cjase se si cjapin stranis clamadis al telefon. (a.d.g.) – 03.02.2026
