Il 20% des aziendis agriculis dal Friûl Vignesie Julie al sta par sierâ, par vie de crisi che al patìs il setôr e che al podarès vê consecuencis une vore brutis pai imprenditôrs e ancje pai citadins che a son i consumadôrs finâi.
Par chest motîf, daspò de manifestazion dal an passât che e veve puartât tal centri di Pordenon cetancj tratôrs, vuê di matine a son tornâts i mieçs vuidâts dai contadins denant de Prefeture. Dome dîs par vie dal limit concuardât cu la polizie, che a son restâts parcâts par oris.
Dilunc dal incuintri cul prefet Michele Lastella, i contadins de Associazion spontanie agricultôrs a àn fevelât dal vuadagn simpri plui bas des lôr aziendis ancje par vie dai coscj simpri plui alts, e des pôris leadis al acuardi tra Union europeane e Mercosur, che al è contestât. (a.d.g.) – 13.02.2026
