Une bande di citadins bulgars, dôs feminis e un om, che a rivavin in Italie e ancje in Austrie juste par robâ e je stade cjapade de Polizie di Stât.
Lis investigazions a jerin tacadis dopo de denunzie di une siore di 79 agns che intun super marcjât di S. Vît dal Tiliment, ai 19 di zenâr di chest an, e veve patît une robarie. Inte stesse zornade, la Polizie e veve regjistrât cuatri episodis diferents, simpri cu la stesse tecniche in cuatri supermarcjâts de provincie.
I delincuents si svicinavin ae vitime, simpri feminis e oms indenant cui agns, e intant che une des dôs feminis la distraevin, che altre e robave, intant che l’om al stave fûr pront a puartâ vie di corse cuntune machine lis laris. I trê a rivavin in Italie doprant une machine cjapade a nauli, a robavin une daûr chê altre lis buteghis e a tornavi daurman in Bulgarie.
Doi di lôr a son stâts cjapâts tal aeropuart di Orio al Serio in Lombardie tal moment che a son smontâts jù di un avion che al rivave de Bulgarie. Pôcs dîs dopo ancje il tierç de bande al è stât arestât dongje de stazion di Triest: ducj e trê si cjatin cumò in preson. (a.d.g.) – 29.07.2025
